pata milta nahin dil ka kahan jins-e-giran rakh di

pata miltā nahīñ dil kā kahāñ jins-e-girāñ rakh dī

isī se zindagānī thī ye shai ham ne kahāñ rakh dī

guzārī zindagānī ham ne yuuñ ḳhāna-badoshī meñ

jahāñ tinke nazar aa.e binā-e-āshiyāñ rakh dī

miTāne ko añdherā qabr kā hai dāġh-e-dil kaafī

ye sham' kyoñ sar-e-marqad uḌāne ko dhuāñ rakh dī

parā.ī aag meñ paḌ kar jo jī par khel jaate haiñ

ḳhudā ne un ke hisse meñ hayāt-e-jāvedāñ rakh dī

kiyā betāb aisā lazzat-e-shauq-e-shahādat ne

rag-e-jāñ meñ bhare nashtar kaleje meñ sināñ rakh dī

bhalā dekheñ to ab kyūñkar na un kā dil pasījegā

dahan meñ nāma-bar ke kaaT kar apnī zabāñ rakh dī

sitam hai ġhair to haiñ bā-vafā maiñ bevafā Thahrā

mujhī pe tum ne kyoñ tohmat nasīb-e-dushmanāñ rakh dī

vahīñ hai chashma-e-zamzam jahāñ par baiTh kar pī lī

vahīñ mai-ḳhāna hai mujh rind ne botal jahāñ rakh dī

suḳhan-var vajd karte haiñ tire ash'ār sun-sun kar

ġhazal meñ baat aisī tū ne 'nāz'-e-nukta-dāñ rakh dī

pata milta nahin dil ka kahan jins-e-giran rakh di

isi se zindagani thi ye shai hum ne kahan rakh di

guzari zindagani hum ne yun KHana-badoshi mein

jahan tinke nazar aae bina-e-ashiyan rakh di

miTane ko andhera qabr ka hai dagh-e-dil kafi

ye sham' kyon sar-e-marqad uDane ko dhuan rakh di

parai aag mein paD kar jo ji par khel jate hain

KHuda ne un ke hisse mein hayat-e-jawedan rakh di

kiya betab aisa lazzat-e-shauq-e-shahadat ne

rag-e-jaan mein bhare nashtar kaleje mein sinan rakh di

bhala dekhen to ab kyunkar na un ka dil pasijega

dahan mein nama-bar ke kaT kar apni zaban rakh di

sitam hai ghair to hain ba-wafa main bewafa Thahra

mujhi pe tum ne kyon tohmat nasib-e-dushmanan rakh di

wahin hai chashma-e-zamzam jahan par baiTh kar pi li

wahin mai-KHana hai mujh rind ne botal jahan rakh di

suKHan-war wajd karte hain tere ash'ar sun-sun kar

ghazal mein baat aisi tu ne 'naz'-e-nukta-dan rakh di