pata raqib ka de jam-e-jam to kya hoga

pata raqīb kā de jām-e-jam to kyā hogā

vo phir uThā.eñge jhūTī qasam to kyā hogā

adā samajhtā rahūñgā tire taġhāful ko

tavīl ho ga.ī shām-e-alam to kyā hogā

jafā kī dhuup meñ guzrī hai zindagī saarī

vafā ke naam pe jheleñge ġham to kyā hogā

abhī to charḳh sitam ham pe Dhaa.e jaatā hai

zamīñ na hogī jo zer-e-qadam to kyā hogā

maiñ Dar rahā huuñ ki zāhid kī ḳhushk bātoñ se

sarāb ban gayā bāġh-e-iram to kyā hogā

ḳhud apnī mauj-e-nafas se ye zāhidān-e-kirām

bujhā rahe haiñ charāġh-e-haram to kyā hogā

pata raqib ka de jam-e-jam to kya hoga

wo phir uThaenge jhuTi qasam to kya hoga

ada samajhta rahunga tere taghaful ko

tawil ho gai sham-e-alam to kya hoga

jafa ki dhup mein guzri hai zindagi sari

wafa ke nam pe jhelenge gham to kya hoga

abhi to charKH sitam hum pe Dhae jata hai

zamin na hogi jo zer-e-qadam to kya hoga

main Dar raha hun ki zahid ki KHushk baaton se

sarab ban gaya bagh-e-iram to kya hoga

KHud apni mauj-e-nafas se ye zahidan-e-kiram

bujha rahe hain charagh-e-haram to kya hoga