pata chala ki meri zindagi mein likkha tha

patā chalā ki mirī zindagī meñ likkhā thā

vo jis kā naam kabhī Diary meñ likkhā thā

vo kis qabīle se hai kaun se gharāne se

sab us ke lahje kī shā.istagī meñ likkhā thā

nazar meñ aa.e bahut se saje bane chehre

magar jo husn tirī sādgī meñ likkhā thā

vo mujh ġharīb kī hālat pe aur kyā kahtā

tamām zahr to us kī hañsī meñ likkhā thā

ga.e dinoñ kī kahānī hai jab ra.īsoñ kā

vaqār chaal kī āhistagī meñ likkhā thā

'farāz' DhūñD rahe ho vafāoñ kī ḳhushbū

ye zā.iqa kisī guzrī sadī meñ likkhā thā

pata chala ki meri zindagi mein likkha tha

wo jis ka nam kabhi Diary mein likkha tha

wo kis qabile se hai kaun se gharane se

sab us ke lahje ki shaistagi mein likkha tha

nazar mein aae bahut se saje bane chehre

magar jo husn teri sadgi mein likkha tha

wo mujh gharib ki haalat pe aur kya kahta

tamam zahr to us ki hansi mein likkha tha

gae dinon ki kahani hai jab raison ka

waqar chaal ki aahistagi mein likkha tha

'faraaz' DhunD rahe ho wafaon ki KHushbu

ye zaiqa kisi guzri sadi mein likkha tha