pata ta-zindagi paya na KHushiyon ke Thikane ka

patā tā-zindagī paayā na ḳhushiyoñ ke Thikāne kā

ye jurmāna lagā ham par kisī se dil lagāne kā

hamāre hausloñ kī āsmāñ bhī daad detā hai

tavāf ab bhī kiyā kartī hai bijlī āshiyāne kā

mirī āñkhoñ meñ apne gaañv ke dilkash manāzir haiñ

irāda kar liyā hai maiñ ne bhī ghar lauT jaane kā

ġhazal kā pairahan maiñ zehn ke sāñche meñ buntā huuñ

zamāna mo'tarif hotā hai mere tāne-bāne kā

ġhamoñ ke vo manāzir ik tabassum ne dikhā.e haiñ

kiyā na hausla ham ne dobāra muskurāne kā

chalo ḳhalvat-kade meñ 'shād' sāhab shaam hotī hai

yahī to vaqt hotā hai kisī kī yaad aane kā

pata ta-zindagi paya na KHushiyon ke Thikane ka

ye jurmana laga hum par kisi se dil lagane ka

hamare hauslon ki aasman bhi dad deta hai

tawaf ab bhi kiya karti hai bijli aashiyane ka

meri aankhon mein apne ganw ke dilkash manazir hain

irada kar liya hai main ne bhi ghar lauT jaane ka

ghazal ka pairahan main zehn ke sanche mein bunta hun

zamana mo'tarif hota hai mere tane-bane ka

ghamon ke wo manazir ek tabassum ne dikhae hain

kiya na hausla hum ne dobara muskurane ka

chalo KHalwat-kade mein 'shad' sahab sham hoti hai

yahi to waqt hota hai kisi ki yaad aane ka