path hai dushwar kya hua sain

path hai dushvār kyā huā sā.īñ

hārtā kyoñ hai hausla sā.īñ

ham sitāroñ ke saath jāgte the

ab nahīñ hotā ratjagā sā.īñ

maiñ fazā meñ thā barg-e-āvāra

ḳhud ko kaise sañbhāltā sā.īñ

aap dekheñ na mujh ko hairat se

rang-o-roġhan utar gayā sā.īñ

fursat-e-yak-nigāh kis ko thī

jo mirī or dekhtā sā.īñ

mere ahbāb haiñ bhale mānas

ek maiñ hī huuñ sar-phirā sā.īñ

amn-e-ālam kī baat kartā hai

hai 'shafaq' kī yahī ḳhatā sā.īñ

path hai dushwar kya hua sain

haarta kyon hai hausla sain

hum sitaron ke sath jagte the

ab nahin hota ratjaga sain

main faza mein tha barg-e-awara

KHud ko kaise sanbhaalta sain

aap dekhen na mujh ko hairat se

rang-o-roghan utar gaya sain

fursat-e-yak-nigah kis ko thi

jo meri or dekhta sain

mere ahbab hain bhale manas

ek main hi hun sar-phira sain

amn-e-alam ki baat karta hai

hai 'shafaq' ki yahi KHata sain