pathrili wo zamin thi koi rasta na tha

pathrīlī vo zamīn thī koī rāsta na thā

guzrā thā kis maqām se mujh ko pata na thā

vo baat mere naam se mansūb kī ga.ī

jis baat se to merā koī vāsta na thā

mushkil ghaḌī meñ ban ke sahārā vo aa gayā

merī taraf jo muḌ ke kabhī dekhtā na thā

patthar kahāñ se aayā thā ye sochnā paḌā

is shahr meñ to merā koī āshnā na thā

andar ke fāsloñ ne pareshān kar diyā

zāhir kā fāsla to koī fāsla na thā

'rahbar' khaḌā thā maiñ kisī anjāne moḌ par

jaarī safar thā aage magar rāsta na thā

pathrili wo zamin thi koi rasta na tha

guzra tha kis maqam se mujh ko pata na tha

wo baat mere nam se mansub ki gai

jis baat se to mera koi wasta na tha

mushkil ghaDi mein ban ke sahaara wo aa gaya

meri taraf jo muD ke kabhi dekhta na tha

patthar kahan se aaya tha ye sochna paDa

is shahr mein to mera koi aashna na tha

andar ke faslon ne pareshan kar diya

zahir ka fasla to koi fasla na tha

'rahbar' khaDa tha main kisi anjaane moD par

jari safar tha aage magar rasta na tha