patte tamam halqa-e-sarsar mein rah gae

patte tamām halqa-e-sarsar meñ rah ga.e

ham shāḳh-e-sabz meñ shajar-e-tar meñ rah ga.e

likh lenā is qadar vo safīne nahīñ mire

sāhil pe rah ga.e jo samundar meñ rah ga.e

us lazzat-e-safar ko maiñ ab un se kyā kahūñ

jo sāya-hā-e-sarv-o-sanobar meñ rah ga.e

āsār-e-yak-ḳharāba-e-ābād ho ke ham

sīnoñ meñ rah na paa.e to patthar meñ rah ga.e

bāhar hī chhoḌ aa.e vo chehra jo ḳhaas thā

ik aam aadmī kī tarah ghar meñ rah ga.e

rusvā unheñ badan ke taqāzoñ ne kar diyā

kyā log the jo TuuT ke pal bhar meñ rah ga.e

tum to anā kā ek jazīra ho soch lo

aise ka.ī jazīre samundar meñ rah ga.e

patte tamam halqa-e-sarsar mein rah gae

hum shaKH-e-sabz mein shajar-e-tar mein rah gae

likh lena is qadar wo safine nahin mere

sahil pe rah gae jo samundar mein rah gae

us lazzat-e-safar ko main ab un se kya kahun

jo saya-ha-e-sarw-o-sanobar mein rah gae

aasar-e-yak-KHaraba-e-abaad ho ke hum

sinon mein rah na pae to patthar mein rah gae

bahar hi chhoD aae wo chehra jo KHas tha

ek aam aadmi ki tarah ghar mein rah gae

ruswa unhen badan ke taqazon ne kar diya

kya log the jo TuT ke pal bhar mein rah gae

tum to ana ka ek jazira ho soch lo

aise kai jazire samundar mein rah gae