patthar bana kar arsh se phenka gaya tha ek main

patthar banā kar arsh se pheñkā gayā thā ek maiñ

shāyad ḳhudā se pahle hī puujā gayā thā ek maiñ

taḳhlīq-kārī meñ tujhe hāsil mahārat hai magar

kis inhimāk-o-shauq se sochā gayā thā ek maiñ

tiflī se piirī tak mire ahvāl sun lenā kabhī

vaqt-e-vilādat hī bahut kosā gayā thā ek maiñ

naqsh-e-qadam bhī aap kā ik saañp kā phan hī lagā

sāya-numā ḳhanjar se hī maarā gayā thā ek maiñ

din sā-re-gā-mā meñ kaTā shab pā-dhā-nī-sā meñ kaTī

niklī surīlī ek vo kaan āshnā thā ek maiñ

kashkol bhī ban jā.egī ik roz apnī khopaḌī

miTTī ke bartan kī tarah bartā gayā thā ek maiñ

gaa.ek huā shā.ir huā āshiq huā suufī huā

dīvāne-pan kī had na thī kyā kyā banā thā ek maiñ

kyā tum hī 'kāvish' ho miyāñ kuchh e.atibār aatā nahīñ

allāh-miyāñ hī ek haiñ kahte ho kyuuñ thā ek maiñ

patthar bana kar arsh se phenka gaya tha ek main

shayad KHuda se pahle hi puja gaya tha ek main

taKHliq-kari mein tujhe hasil mahaarat hai magar

kis inhimak-o-shauq se socha gaya tha ek main

tifli se piri tak mere ahwal sun lena kabhi

waqt-e-wiladat hi bahut kosa gaya tha ek main

naqsh-e-qadam bhi aap ka ek sanp ka phan hi laga

saya-numa KHanjar se hi mara gaya tha ek main

din sa-re-ga-ma mein kaTa shab pa-dha-ni-sa mein kaTi

nikli surili ek wo kan aashna tha ek main

kashkol bhi ban jaegi ek roz apni khopaDi

miTTi ke bartan ki tarah barta gaya tha ek main

gaek hua shair hua aashiq hua sufi hua

diwane-pan ki had na thi kya kya bana tha ek main

kya tum hi 'kawish' ho miyan kuchh eatibar aata nahin

allah-miyan hi ek hain kahte ho kyun tha ek main