patthar-dil ko mom banaya kafir but ko ram kiya

patthar-dil ko mom banāyā kāfir but ko raam kiyā

kaam to āḳhir itnā tū ne aaj dil-e-nākām kiyā

ek ne rāz-e-ishq chhupāyā ek ne tasht-az-bām kiyā

zabt ne parda-dārī kī aur ashkoñ ne badnām kiyā

sikka vafā kā ham ne biThāyā aap ne jaur-e-ām kiyā

ham ne apnā kaam kiyā aur aap ne apnā kaam kiyā

umr guzārī rote-dhote aaheñ bhar mātam karte

aap pe marne vāloñ ne kab chain kiyā ārām kiyā

thaam liyā us shoḳh kā dāman girte girte muTThī meñ

sadqe maiñ is laġhzish par is laġhzish ne kyā kaam kiyā

bhuul na jaa.e raah 'mubārak' un logoñ kī raah chalā

jin par mere maulā tū ne fazl kiyā in.aam kiyā

patthar-dil ko mom banaya kafir but ko ram kiya

kaam to aaKHir itna tu ne aaj dil-e-nakaam kiya

ek ne raaz-e-ishq chhupaya ek ne tasht-az-baam kiya

zabt ne parda-dari ki aur ashkon ne badnam kiya

sikka wafa ka hum ne biThaya aap ne jaur-e-am kiya

hum ne apna kaam kiya aur aap ne apna kaam kiya

umr guzari rote-dhote aahen bhar matam karte

aap pe marne walon ne kab chain kiya aaram kiya

tham liya us shoKH ka daman girte girte muTThi mein

sadqe main is laghzish par is laghzish ne kya kaam kiya

bhul na jae rah 'mubarak' un logon ki rah chala

jin par mere maula tu ne fazl kiya inam kiya