patthar ke KHuda patthar ke sanam patthar ke hi insan pae hain

patthar ke ḳhudā patthar ke sanam patthar ke hī insāñ paa.e haiñ

tum shahr-e-mohabbat kahte ho ham jaan bachā kar aa.e haiñ

but-ḳhāna samajhte ho jis ko pūchho na vahāñ kyā hālat hai

ham log vahīñ se lauTe haiñ bas shukr karo lauT aa.e haiñ

ham soch rahe haiñ muddat se ab umr guzāreñ bhī to kahāñ

sahrā meñ ḳhushī ke phuul nahīñ shahroñ meñ ġhamoñ ke saa.e haiñ

hoñToñ pe tabassum halkā sā āñkhoñ meñ namī sī hai 'fākir'

ham ahl-e-mohabbat par aksar aise bhī zamāne aa.e haiñ

patthar ke KHuda patthar ke sanam patthar ke hi insan pae hain

tum shahr-e-mohabbat kahte ho hum jaan bacha kar aae hain

but-KHana samajhte ho jis ko puchho na wahan kya haalat hai

hum log wahin se lauTe hain bas shukr karo lauT aae hain

hum soch rahe hain muddat se ab umr guzaren bhi to kahan

sahra mein KHushi ke phul nahin shahron mein ghamon ke sae hain

honTon pe tabassum halka sa aankhon mein nami si hai 'fakir'

hum ahl-e-mohabbat par aksar aise bhi zamane aae hain