پتھر پہ کوئی گردش ایام نہیں ہے

پتھر پہ کوئی گردش ایام نہیں ہے

دنیا میں ہم ایسوں کا کوئی کام نہیں ہے

کیا سب دل افسردہ سے نکلے ہیں برابر

اب خانۂ ماتم میں وہ کہرام نہیں ہے

سنتا ہے کوئی غور سے افسانۂ ماضی

ماضی کہ جہاں لذت انجام نہیں ہے

ڈھ جائے گی دنیا کے تھپیڑوں سے یہ اک دن

دیوار تصور پہ کوئی بام نہیں ہے

احوال دل زار وہ پوچھے تو بتانا

کہنا دل بیمار کو آرام نہیں ہے

یہ مدح سرائی تو مجھے ٹھیک ہے لیکن

تم نے جو لیا ہے وہ مرا نام نہیں ہے