patthar pe koi gardish-e-ayyam nahin hai

patthar pe koī gardish-e-ayyām nahīñ hai

duniyā meñ ham aisoñ kā koī kaam nahīñ hai

kyā sab dil-e-afsurda se nikle haiñ barābar

ab ḳhāna-e-mātam meñ vo kohrām nahīñ hai

suntā hai koī ġhaur se afsāna-e-māzī

maazī ki jahāñ lazzat-e-anjām nahīñ hai

Dheh jā.egī duniyā ke thapeḌoñ se ye ik din

dīvār-e-tasavvur pe koī baam nahīñ hai

ahvāl-e-dil-e-zār vo pūchhe to batānā

kahnā dil-e-bīmār ko ārām nahīñ hai

ye mad.h-sarā.ī to mujhe Thiik hai lekin

tum ne jo liyā hai vo mirā naam nahīñ hai

patthar pe koi gardish-e-ayyam nahin hai

duniya mein hum aison ka koi kaam nahin hai

kya sab dil-e-afsurda se nikle hain barabar

ab KHana-e-matam mein wo kohram nahin hai

sunta hai koi ghaur se afsana-e-mazi

mazi ki jahan lazzat-e-anjam nahin hai

Dheh jaegi duniya ke thapeDon se ye ek din

diwar-e-tasawwur pe koi baam nahin hai

ahwal-e-dil-e-zar wo puchhe to batana

kahna dil-e-bimar ko aaram nahin hai

ye madh-sarai to mujhe Thik hai lekin

tum ne jo liya hai wo mera nam nahin hai