patthar se kya shakl nikale ye hum kya jaanen

patthar se kyā shakl nikāle ye ham kyā jāneñ

aazar kis paikar meñ Dhāle ye ham kyā jāneñ

kaun havā kā haath baḌhā.e naav ulaT jaa.e

dariyā kuude kaun uchhāle ye ham kyā jāneñ

niiñd bhare halkore leñ rāteñ kis ke hāthoñ

kaun charāġh-e-sub.h ujāle ye ham kyā jāneñ

kyā kahiye kis zahr kī kaaT ragoñ meñ phirtī hai

kis ne bujhā.e zahr meñ bhāle ye ham kyā jāneñ

ik paanī kī oT meñ saarī duniyā bastī hai

kis ne bhare ā.ankhoñ ke pyāle ye ham kyā jāneñ

khoī huī bheḌeñ haiñ ham jaane kis galle kī

kis din aa jaa.eñ rakhvāle ye ham kyā jāneñ

har din us kā har shab us kī har mausam us kā

kis ne tane ā.ankhoñ par jaale ye ham kyā jāneñ

in hāthoñ kī chhāñv mayassar aa.egī kab tak

kis din peḌ ye chhāñv uThā le ye ham kyā jāneñ

saat sitāre añg tumhāre palak palak taare

kis ne jagā.e ye ujiyāle ye ham kyā jāneñ

maut kī niiñd sulā de 'ḳhālid' kin hāthoñ kī thapak

nezoñ par sar kaun uchhāle ye ham kyā jāneñ

patthar se kya shakl nikale ye hum kya jaanen

aazar kis paikar mein Dhaale ye hum kya jaanen

kaun hawa ka hath baDhae naw ulaT jae

dariya kude kaun uchhaale ye hum kya jaanen

nind bhare halkore len raaten kis ke hathon

kaun charagh-e-subh ujale ye hum kya jaanen

kya kahiye kis zahr ki kaT ragon mein phirti hai

kis ne bujhae zahr mein bhaale ye hum kya jaanen

ek pani ki oT mein sari duniya basti hai

kis ne bhare aaankhon ke pyale ye hum kya jaanen

khoi hui bheDen hain hum jaane kis galle ki

kis din aa jaen rakhwale ye hum kya jaanen

har din us ka har shab us ki har mausam us ka

kis ne tane aaankhon par jale ye hum kya jaanen

in hathon ki chhanw mayassar aaegi kab tak

kis din peD ye chhanw uTha le ye hum kya jaanen

sat sitare ang tumhaare palak palak tare

kis ne jagae ye ujiyale ye hum kya jaanen

maut ki nind sula de 'KHalid' kin hathon ki thapak

nezon par sar kaun uchhaale ye hum kya jaanen