patthar se na maro mujhe diwana samajh kar

patthar se na maaro mujhe dīvāna samajh kar

aayā huuñ idhar kūcha-e-jānāna samajh kar

kahte haiñ ye rone se lagī dil kī bujhegī

samjhāte haiñ apnā mujhe parvāna samajh kar

maiñ vo huuñ ki serī mujhe hotī nahīñ mai se

denā mire saaqī mujhe paimāna samajh kar

naḳhvat se jo ik baat na sunte the hamārī

ḳhud chheḌ rahe haiñ hameñ dīvāna samajh kar

ham un ke haiñ dil un kā hai jaañ un kī hai lekin

phir muñh ko chhupāte haiñ vo begāna samajh kar

rakkhā na kahīñ kā hameñ barbādi-e-dil ne

armān Thaharte nahīñ vīrāna samajh kar

dekh aap se bāhar na ho mansūr kī sūrat

karnā hai to kar nāra-e-mastāna samajh kar

ham aur hī kuchh DhūñDte phirte haiñ butoñ meñ

but-ḳhāne meñ jaate nahīñ but-ḳhāna samajh kar

ḳhūbāñ se paTe yā na paTe vasl kā saudā

dil pahle hī le lete haiñ bai.āna samajh kar

saaqī kī jo āñkhoñ ko huī bazm meñ gardish

ham lauT ga.e gardish-e-paimāna samajh kar

kah jaate 'hafīz' un ko ho tum josh meñ kyā kuchh

vo tarah diye jaate haiñ dīvāna samajh kar

patthar se na maro mujhe diwana samajh kar

aaya hun idhar kucha-e-jaanana samajh kar

kahte hain ye rone se lagi dil ki bujhegi

samjhate hain apna mujhe parwana samajh kar

main wo hun ki seri mujhe hoti nahin mai se

dena mere saqi mujhe paimana samajh kar

naKHwat se jo ek baat na sunte the hamari

KHud chheD rahe hain hamein diwana samajh kar

hum un ke hain dil un ka hai jaan un ki hai lekin

phir munh ko chhupate hain wo begana samajh kar

rakkha na kahin ka hamein barbaadi-e-dil ne

arman Thaharte nahin virana samajh kar

dekh aap se bahar na ho mansur ki surat

karna hai to kar nara-e-mastana samajh kar

hum aur hi kuchh DhunDte phirte hain buton mein

but-KHane mein jate nahin but-KHana samajh kar

KHuban se paTe ya na paTe wasl ka sauda

dil pahle hi le lete hain baiana samajh kar

saqi ki jo aankhon ko hui bazm mein gardish

hum lauT gae gardish-e-paimana samajh kar

kah jate 'hafiz' un ko ho tum josh mein kya kuchh

wo tarah diye jate hain diwana samajh kar