پتھر اٹھایا اس نے تو مجبور ہو گئے

پتھر اٹھایا اس نے تو مجبور ہو گئے

کرتے بھی کیا کہ شیشہ تھے ہم چور ہو گئے

میرے مکاں کے شعلوں میں جلنے کی دیر تھی

حالات اس کے بعد بدستور ہو گئے

کیوں زندگی کے رقص میں شامل نہیں ہیں اب

یہ جا کے ان سے پوچھ جو معذور ہو گئے

ہم آفتاب رکھ کے رہے انکسار میں

جگنو ملا انہیں تو وہ مغرور ہو گئے

یہ حق کشی کا دور ہے اس واسطے ترے

ناحق مطالبات بھی منظور ہو گئے

عبادؔ فکر میری تھی سوچیں مری مگر

نکلیں قلم سے جن کے وہ مشہور ہو گئے