pattharon ki qaid mein ek aabju

pattharoñ kī qaid meñ ik aabjū

be-karāñ niilā samundar chaar sū

reza reza ho gayā huuñ maiñ agar

chuur vo bhī ho chukā hai mū-ba-mū

yaad kā be-nām sā ab lams aur

mere andar mushk-bū hī mushk-bū

oḌh leñ ab raat kī ThanDak tamām

hai isī meñ terī merī aabrū

kaun thā jis ne mujhe tanhā kiyā

chhīn kar mujh se tumhārī aarzū

kyā nazar aaya hai tujh ko abr meñ

kyoñ huā hai is qadar bīmār tū

phuul kī rekhā meñ us ne dekh kar

khīñch dī tasvīr merī hū-ba-hū

phuul ḳhushbū rang kāġhaz aur maiñ

ho rahī hai be-sadā ik guftugū

aks-andar-aks maiñ aa.uuñ nazar

tū agar aa jaa.e mere rū-ba-rū

pattharon ki qaid mein ek aabju

be-karan nila samundar chaar su

reza reza ho gaya hun main agar

chur wo bhi ho chuka hai mu-ba-mu

yaad ka be-nam sa ab lams aur

mere andar mushk-bu hi mushk-bu

oDh len ab raat ki ThanDak tamam

hai isi mein teri meri aabru

kaun tha jis ne mujhe tanha kiya

chhin kar mujh se tumhaari aarzu

kya nazar aaya hai tujh ko abr mein

kyon hua hai is qadar bimar tu

phul ki rekha mein us ne dekh kar

khinch di taswir meri hu-ba-hu

phul KHushbu rang kaghaz aur main

ho rahi hai be-sada ek guftugu

aks-andar-aks main aaun nazar

tu agar aa jae mere ru-ba-ru