پتھروں پر لکھا مٹاتا ہوں

پتھروں پر لکھا مٹاتا ہوں

اس طرح میں اسے بھلاتا ہوں

جب بھی ڈرتی ہے زندگی تو اسے

موت کے فائدے گناتا ہوں

وصل کا تجربہ نہیں ہے مجھے

ہجر کی شاعری سناتا ہوں

دل میں اک موت روز ہوتی ہے

روز اک لاش میں اٹھاتا ہوں

درد آرام دینے لگتا ہے

زخم پر زخم جب لگاتا ہوں

سانس جاتی ہے لے کے دور مجھے

سانس آتی ہے لوٹ آتا ہوں

پہلے کرتا ہوں خود اسے ناراض

اور پھر دیر تک مناتا ہوں

رقص کرتی ہیں گمشدہ یادیں

آج سب آئنہ بجھاتا ہوں

جانتا ہوں کہ در کھلے گا نہیں

بے سبب چابیاں گھماتا ہوں