patton ke TuTne ki sada der tak chali

pattoñ ke TūTne kī sadā der tak chalī

kal dasht-e-jism-o-jāñ meñ havā der tak chalī

raushan rahīñ nigār-e-hunar kī hatheliyāñ

apnī dukān-e-rang-e-hinā der tak chalī

jab niiñd uḌ ga.ī to sitāre bahut khule

jab raat ghaT ga.ī to havā der tak chalī

ham band kar ke so ga.e ḳhushbū kī khiḌkiyāñ

sunte haiñ raat bād-e-sabā der tak chalī

mahfil meñ chal paḌī thī hamāre junūñ kī baat

phir dāstān-e-chāk-e-qabā der tak chalī

sāhil pe aa ke Duub ga.iiñ sab aqīdateñ

gahre samundaroñ meñ duā der tak chalī

patton ke TuTne ki sada der tak chali

kal dasht-e-jism-o-jaan mein hawa der tak chali

raushan rahin nigar-e-hunar ki hatheliyan

apni dukan-e-rang-e-hina der tak chali

jab nind uD gai to sitare bahut khule

jab raat ghaT gai to hawa der tak chali

hum band kar ke so gae KHushbu ki khiDkiyan

sunte hain raat baad-e-saba der tak chali

mahfil mein chal paDi thi hamare junun ki baat

phir dastan-e-chaak-e-qaba der tak chali

sahil pe aa ke Dub gain sab aqidaten

gahre samundaron mein dua der tak chali