payami kaamyab aae na aae

payāmī kāmyāb aa.e na aa.e

ḳhudā jaane javāb aa.e na aa.e

tire ġhamzoñ ko apne kaam se kaam

kisī ke dil ko taab aa.e na aa.e

use sharmā.eñge zikr-e-adū par

ye qismat hai hijāb aa.e na aa.e

tum aao jab savār-e-tausan-e-nāz

qayāmat ham-rikāb aa.e na aa.e

shumār apnī ḳhatāoñ kā batā duuñ

tumheñ shāyad hisāb aa.e na aa.e

na.e ḳhanjar se mujh ko zab.h kiije

phir aisī āb-o-tāb aa.e na aa.e

shab-e-vasl-e-adū terī balā se

kisī muztar ko ḳhvāb aa.e na aa.e

piyūñgā aaj saaqī ser ho kar

mayassar phir sharāb aa.e na aa.e

ye jā kar pūchh aa tū un se darbāñ

ki vo ḳhāna-ḳharāb aa.e na aa.e

na dekho 'dāġh' kā dīvān dekho

samajh meñ ye kitāb aa.e na aa.e

payami kaamyab aae na aae

KHuda jaane jawab aae na aae

tere ghamzon ko apne kaam se kaam

kisi ke dil ko tab aae na aae

use sharmaenge zikr-e-adu par

ye qismat hai hijab aae na aae

tum aao jab sawar-e-tausan-e-naz

qayamat ham-rikab aae na aae

shumar apni KHataon ka bata dun

tumhein shayad hisab aae na aae

nae KHanjar se mujh ko zabh kije

phir aisi aab-o-tab aae na aae

shab-e-wasl-e-adu teri bala se

kisi muztar ko KHwab aae na aae

piyunga aaj saqi ser ho kar

mayassar phir sharab aae na aae

ye ja kar puchh aa tu un se darban

ki wo KHana-KHarab aae na aae

na dekho 'dagh' ka diwan dekho

samajh mein ye kitab aae na aae