payambar main nahin aashiq hun jaani

payambar maiñ nahīñ 'āshiq huuñ jaanī

rahe muusī hī se ye lan-tarānī

sulaimāñ ham haiñ ai mahbūb-e-jānī

samajhte haiñ tujhe bilqīs-e-sānī

khulā saude meñ un zulfoñ ke mar kar

pareshāñ ḳhvāb thī ye zindagānī

ye kyuuñ aatā hai un se qad-kushī ko

gaḌī jaatī hai sarv-e-bostānī

vahī degā kabāb-e-nargisī bhī

jo detā hai sharāb-e-arġhavānī

rañgā hai ishq ne kis dard-e-sar se

hamārā jāma-e-tan za.afrānī

musāfir kī tarah rah ḳhāna-bar-dosh

nahīñ jā.e-e-iqāmat dār-e-fānī

tire kūche ke mushtāqoñ ke aage

jahannam hai bahisht-e-āsmānī

vo mai-kash huuñ diyā hai qābla ne

jise ġhusl-e-sharāb-e-arġhavānī

yaqīñ hai dīda-e-bārīk-bīñ ko

kare ainak talab ye nā-tavānī

vo ḳhat hai yādgār-e-husn-e-rafta

vo sabza hai gulistāñ kī nishānī

nikaltī muñh se qāsid ke nahīñ baat

magar laayā hai paiġhām-e-zabānī

ye musht-e-ḳhāk ho maqbūl-e-dargāh

sabā kī chāhtā huuñ mehrbānī

liye haiñ bosa-e-ruḳhsāra-e-sāf

piyā hai ham ne ā.īne kā paanī

safedī mū kī ho kāfūr har-chand

koī miTtā hai ye dāġh-e-javānī

na ḳhush ho farbahī-e-tan se ġhāfil

subuk kartī hai murde ko girānī

mue jo peshtar marne se vo log

kafan samjhe qabā-e-zindagānī

jalātī hai dil 'ātish' tuur kī tarah

kisī parda-nashīñ kī lan-tarānī

payambar main nahin 'ashiq hun jaani

rahe musi hi se ye lan-tarani

sulaiman hum hain ai mahbub-e-jaani

samajhte hain tujhe bilqis-e-sani

khula saude mein un zulfon ke mar kar

pareshan KHwab thi ye zindagani

ye kyun aata hai un se qad-kushi ko

gaDi jati hai sarw-e-bostani

wahi dega kabab-e-nargisi bhi

jo deta hai sharab-e-arghawani

ranga hai ishq ne kis dard-e-sar se

hamara jama-e-tan zafrani

musafir ki tarah rah KHana-bar-dosh

nahin jae-e-iqamat dar-e-fani

tere kuche ke mushtaqon ke aage

jahannam hai bahisht-e-asmani

wo mai-kash hun diya hai qabla ne

jise ghusl-e-sharab-e-arghawani

yaqin hai dida-e-barik-bin ko

kare ainak talab ye na-tawani

wo KHat hai yaadgar-e-husn-e-rafta

wo sabza hai gulistan ki nishani

nikalti munh se qasid ke nahin baat

magar laya hai paigham-e-zabani

ye musht-e-KHak ho maqbul-e-dargah

saba ki chahta hun mehrbani

liye hain bosa-e-ruKHsara-e-saf

piya hai hum ne aaine ka pani

safedi mu ki ho kafur har-chand

koi miTta hai ye dagh-e-jawani

na KHush ho farbahi-e-tan se ghafil

subuk karti hai murde ko girani

mue jo peshtar marne se wo log

kafan samjhe qaba-e-zindagani

jalati hai dil 'atish' tur ki tarah

kisi parda-nashin ki lan-tarani