pech fiqre par kiya jata nahin

pech fiqre par kiyā jaatā nahīñ

koī dhāgā do baTā jaatā nahīñ

bosa-e-lab ġhair ko dete ho tum

muñh mirā mīThā kiyā jaatā nahīñ

zo.af ne yak-dast toḌe pā-e-zīst

nabz-e-murda huuñ hilā jaatā nahīñ

zulf se sumbul kare kyā ham-sarī

pech choTī kā kiyā jaatā nahīñ

teġh-e-husn-e-yār se majrūh hai

tota-e-ḳhat se uḌā jaatā nahīñ

qabr kā tālib abas hai jism-e-zār

chashm-e-dushman meñ samā jaatā nahīñ

kyā kashīda sūrat-e-tasvīr huuñ

nā-tavānī se khiñchā jaatā nahīñ

zo.af se pahuñcheñge kyūñ-kar aap tak

aap se bāhar huā jaatā nahīñ

khiñch sake tasvīr betābī meñ kyā

ek sūrat par rahā jaatā nahīñ

ruuh ko bhī bosa-e-lab kī hai chaaT

mar ga.e lekin marā jaatā nahīñ

murde se bad-tar huuñ go jiitā huuñ maiñ

rañg-e-hastī meñ milā jaatā nahīñ

rañg kyā qadd-ḳhamīda kā khile

chhalle ke gul se khilā jaatā nahīñ

roz añgiyā hotī hai ārāsta

kab nayā bañgla sajā jaatā nahīñ

pech meñ aane ko tāqat chāhiye

tere dam par bhī chaḌhā jaatā nahīñ

itr khiñchtā hai hamārī ḳhaak kā

haath malne kā mazā jaatā nahīñ

chuTkiyāñ mere sarāpe meñ na lo

jāma-e-hastī chunā jaatā nahīñ

koī kyā ham ko bānegā 'munīr'

aise bigḌe haiñ banā jaatā nahīñ

pech fiqre par kiya jata nahin

koi dhaga do baTa jata nahin

bosa-e-lab ghair ko dete ho tum

munh mera miTha kiya jata nahin

zoaf ne yak-dast toDe pa-e-zist

nabz-e-murda hun hila jata nahin

zulf se sumbul kare kya ham-sari

pech choTi ka kiya jata nahin

tegh-e-husn-e-yar se majruh hai

tota-e-KHat se uDa jata nahin

qabr ka talib abas hai jism-e-zar

chashm-e-dushman mein sama jata nahin

kya kashida surat-e-taswir hun

na-tawani se khincha jata nahin

zoaf se pahunchenge kyun-kar aap tak

aap se bahar hua jata nahin

khinch sake taswir betabi mein kya

ek surat par raha jata nahin

ruh ko bhi bosa-e-lab ki hai chaT

mar gae lekin mara jata nahin

murde se bad-tar hun go jita hun main

rang-e-hasti mein mila jata nahin

rang kya qadd-KHamida ka khile

chhalle ke gul se khila jata nahin

roz angiya hoti hai aarasta

kab naya bangla saja jata nahin

pech mein aane ko taqat chahiye

tere dam par bhi chaDha jata nahin

itr khinchta hai hamari KHak ka

hath malne ka maza jata nahin

chuTkiyan mere sarape mein na lo

jama-e-hasti chuna jata nahin

koi kya hum ko banega 'munir'

aise bigDe hain bana jata nahin