پیڑ بیوہ ہو گئے اور پتیاں سب اڑ گئیں

پیڑ بیوہ ہو گئے اور پتیاں سب اڑ گئیں

مسکراتے موسموں کی دھجیاں سب اڑ گئیں

دفن جب سے ہو گئی ہیں عظمتیں پہچان کی

چاہتیں ہیں خشک رشتہ داریاں سب اڑ گئیں

بلبلوں کا چہچہانا ہے نہ کھیتوں کی قطار

کیا لگا کے پنکھ اپنی بستیاں سب اڑ گئیں

نفرتوں کی آنچ نے جب چھو لیا ہے آسماں

زندگی سے آپسی ہمدردیاں سب اڑ گئیں

کل تلک تھی حکم رانی تیرگی کی ہر طرف

روشنی آتے ہی گھر کی بتیاں سب اڑ گئیں

اس قدر اونچی ہوئی ہیں آدمیت کی لویں

آسماں کی سمت ہی پرچھائیاں سب اڑ گئیں

ہر نئے دن دھوپ کی کرنوں سے مل کر کیوں صباؔ

نیم باز آنکھوں سے شب کی مستیاں سب اڑ گئیں