pesh-e-idrak meri fikr ke shane khul jaen

pesh-e-idrāk mirī fikr ke shāne khul jaa.eñ

har taraf ālam-e-imkāñ ke bahāne khul jaa.eñ

tujh pe mauqūf hai duniyā kī tahī-dāmānī

tū jo khul jaa.e to aalam ke ḳhazāne khul jaa.eñ

phir se āñkhoñ ko mirī nūr-e-basīrat ho atā

is sanam-ḳhāne meñ phir ā.ina-ḳhāne khul jaa.eñ

sham-e-hastī huī bedār falak se kah do

az.hdahān-e-shab-e-zulmat ke dahāne khul jaa.eñ

ab koī dast-e-rifāqat na rakhe siine par

ain mumkin hai ki zaḳhmoñ ke muhāne khul jaa.eñ

adh-khulī aañkh meñ raqsāñ hai ġham-e-mustaqbil

band ho aañkh to gum-gashta zamāne khul jaa.eñ

tū agar fikr kī parvāz ko baḳhshe rif.at

kaun jaane ki kahāñ kitne Thikāne khul jaa.eñ

lab-kushā hoñ to bikhar jaa.eñ fasāne kitne

chup jo ho jā.ūñ to aurāq purāne khul jaa.eñ

is aqīdat ko mohabbat se badal le 'sālim'

kyā pata kab tirī tasbīh ke daane khul jaa.eñ

pesh-e-idrak meri fikr ke shane khul jaen

har taraf aalam-e-imkan ke bahane khul jaen

tujh pe mauquf hai duniya ki tahi-damani

tu jo khul jae to aalam ke KHazane khul jaen

phir se aankhon ko meri nur-e-basirat ho ata

is sanam-KHane mein phir aaina-KHane khul jaen

sham-e-hasti hui bedar falak se kah do

azhdahan-e-shab-e-zulmat ke dahane khul jaen

ab koi dast-e-rifaqat na rakhe sine par

ain mumkin hai ki zaKHmon ke muhane khul jaen

adh-khuli aankh mein raqsan hai gham-e-mustaqbil

band ho aankh to gum-gashta zamane khul jaen

tu agar fikr ki parwaz ko baKHshe rifat

kaun jaane ki kahan kitne Thikane khul jaen

lab-kusha hon to bikhar jaen fasane kitne

chup jo ho jaun to auraq purane khul jaen

is aqidat ko mohabbat se badal le 'salim'

kya pata kab teri tasbih ke dane khul jaen