pesh-e-manzar mein hai kuchh aur kuchh pas-e-manzar mein hai

pesh-e-manzar meñ hai kuchh aur kuchh pas-e-manzar meñ hai

kuchh haqīqat kuchh fasāna raam aur bābar meñ hai

ġham ke maaro muḳhtasar hai arsa-e-tīra-shabī

aur is ke baa'd sab kuchh panja-e-dāvar meñ hai

ḳhvāb saare ho ga.e haiñ niiñd se ab māvarā

pesh kar ġhāfil amal koī agar daftar meñ hai

haal maazī aur mustaqbil sabhī to us ke haiñ

hastī apnī us kī ḳhātir sīġha-e-masdar meñ hai

qātilā ḳhanjar tirā us aab se mahrūm hai

ik chamak bijlī sī jo bismil ke ab tevar meñ hai

chār-sū ik hū kā aalam har taraf sannāTā hai

ab 'qamar' bhī yuuñ hī sā be-kār baiThā ghar meñ hai

pesh-e-manzar mein hai kuchh aur kuchh pas-e-manzar mein hai

kuchh haqiqat kuchh fasana ram aur babar mein hai

gham ke maro muKHtasar hai arsa-e-tira-shabi

aur is ke ba'd sab kuchh panja-e-dawar mein hai

KHwab sare ho gae hain nind se ab mawara

pesh kar ghafil amal koi agar daftar mein hai

haal mazi aur mustaqbil sabhi to us ke hain

hasti apni us ki KHatir sigha-e-masdar mein hai

qatila KHanjar tera us aab se mahrum hai

ek chamak bijli si jo bismil ke ab tewar mein hai

chaar-su ek hu ka aalam har taraf sannaTa hai

ab 'qamar' bhi yun hi sa be-kar baiTha ghar mein hai