pesh-e-nazar nahin hai jo kuchh din se ru-e-dost

pesh-e-nazar nahīñ hai jo kuchh din se rū-e-dost

bechain kar rahī hai bahut ārzū-e-dost

āñkhoñ se duur ho bhī ga.e vo to kyā huā

dil meñ basī huī hai tamannā-e-rū-e-dost

gulzār-e-āshiqī kī fazā pur-bahār hai

phailā huā hai chaar taraf rang-o-bū-e-dost

kānoñ meñ aa rahī hai barābar vahī sadā

bhūlī nahīñ hai dil ko mire guftugū-e-dost

gūñjī huī fazā meñ hai vo saut-e-jāñ-navāz

allah re lutf-o-soz-e-navā-e-gulū-e-dost

haiñ mun.akis tamām nuqūsh-e-jamāl-e-yār

dil ek aa.ina hai ki hai rū-ba-rū-e-dost

har dam bahār jalva-e-jānāñ hai nau-ba-nau

hairāñ huuñ dekh dekh ke josh-e-numū-e-dost

parvā nahīñ jo rāh-e-mohabbat meñ sar gayā

ham jaan de ke ho to ga.e surḳh-rū-e-dost

iqrār meñ to ḳhair numāyāñ thā lutf-e-yār

inkār meñ bhī haa.e vo tarz-e-nikū-e-dost

dīvāngī meñ ham ne ye dil se kahā thā kal

tujh ko qasam hai aaj se dekhe jo rū-e-dost

lekin junūn-e-shauq kī aa.ī jo ek lahr

mastānā-vār chal hī diye ham ba-kū-e-dost

zāhid fareb-e-sāġhar-e-kausar 'jalīl' ko

jo kar chukā hai bai'at-e-jām-o-subū-e-dost

pesh-e-nazar nahin hai jo kuchh din se ru-e-dost

bechain kar rahi hai bahut aarzu-e-dost

aankhon se dur ho bhi gae wo to kya hua

dil mein basi hui hai tamanna-e-ru-e-dost

gulzar-e-ashiqi ki faza pur-bahaar hai

phaila hua hai chaar taraf rang-o-bu-e-dost

kanon mein aa rahi hai barabar wahi sada

bhuli nahin hai dil ko mere guftugu-e-dost

gunji hui faza mein hai wo saut-e-jaan-nawaz

allah re lutf-o-soz-e-nawa-e-gulu-e-dost

hain munakis tamam nuqush-e-jamal-e-yar

dil ek aaina hai ki hai ru-ba-ru-e-dost

har dam bahaar jalwa-e-jaanan hai nau-ba-nau

hairan hun dekh dekh ke josh-e-numu-e-dost

parwa nahin jo rah-e-mohabbat mein sar gaya

hum jaan de ke ho to gae surKH-ru-e-dost

iqrar mein to KHair numayan tha lutf-e-yar

inkar mein bhi hae wo tarz-e-niku-e-dost

diwangi mein hum ne ye dil se kaha tha kal

tujh ko qasam hai aaj se dekhe jo ru-e-dost

lekin junun-e-shauq ki aai jo ek lahr

mastana-war chal hi diye hum ba-ku-e-dost

zahid fareb-e-saghar-e-kausar 'jalil' ko

jo kar chuka hai bai'at-e-jam-o-subu-e-dost