pesh har ahd ko ek tegh ka imkan kyun hai

pesh har ahd ko ik teġh kā imkāñ kyuuñ hai

har nayā daur na.e ḳhauf meñ ġhaltāñ kyuuñ hai

shahr ke shahr hī behosh paḌe pūchhte haiñ

zindagī apne amal-dāroñ se nālāñ kyuuñ hai

aa.ina aks mo.attal to nahīñ kartā kabhī

itnā be-āb magar ā.īna-e-jāñ kyuuñ hai

phir se matlūb-e-ḳhalā.iq hai gavāhī koī

bar-sar-e-koh-e-siyah shola-e-larzāñ kyuuñ hai

ye amal hai ḳhas-o-ḳhāshāk kī chhidrā.ī kā

rañg-e-rañgīn-e-gul-o-lāla pareshāñ kyuuñ hai

pesh har ahd ko ek tegh ka imkan kyun hai

har naya daur nae KHauf mein ghaltan kyun hai

shahr ke shahr hi behosh paDe puchhte hain

zindagi apne amal-daron se nalan kyun hai

aaina aks moattal to nahin karta kabhi

itna be-ab magar aaina-e-jaan kyun hai

phir se matlub-e-KHalaiq hai gawahi koi

bar-sar-e-koh-e-siyah shola-e-larzan kyun hai

ye amal hai KHas-o-KHashak ki chhidrai ka

rang-e-rangin-e-gul-o-lala pareshan kyun hai