pesh-KHema ye kisi ek musibat ka nahin

pesh-ḳhema ye kisī ek musībat kā nahīñ

dukh hai kuchh aur mirī jaan masāfat kā nahīñ

ham mazāfāt se aa.e hue logoñ kā miyāñ

mas.ala rizq kā hotā hai mohabbat kā nahīñ

jism kī jiit koī jiit nahīñ mere liye

ye vo sāmān hai jo merī zarūrat kā nahīñ

thoḌī koshish se hī aa jaatī hai ab niiñd mujhe

is kā matlab hai ki vo merī tabī.at kā nahīñ

ye to ḳhud chal ke nishāne pe lage haiñ tere

daḳhl is meñ to koī terī mahārat kā nahīñ

roz dariyā meñ jo ik phuul bahā detā huuñ

ye kisī dukh kā ishāra hai aqīdat kā nahīñ

ham haiñ haare hue lashkar ke sipāhī 'sāhir'

fā.eda ham ko kisī kī bhī himāyat kā nahīñ

pesh-KHema ye kisi ek musibat ka nahin

dukh hai kuchh aur meri jaan masafat ka nahin

hum mazafat se aae hue logon ka miyan

masala rizq ka hota hai mohabbat ka nahin

jism ki jit koi jit nahin mere liye

ye wo saman hai jo meri zarurat ka nahin

thoDi koshish se hi aa jati hai ab nind mujhe

is ka matlab hai ki wo meri tabiat ka nahin

ye to KHud chal ke nishane pe lage hain tere

daKHl is mein to koi teri mahaarat ka nahin

roz dariya mein jo ek phul baha deta hun

ye kisi dukh ka ishaara hai aqidat ka nahin

hum hain haare hue lashkar ke sipahi 'sahir'

faeda hum ko kisi ki bhi himayat ka nahin