phaila ke sar pe dard ki chadar chala gaya

phailā ke sar pe dard kī chādar chalā gayā

ik shaḳhs merī ruuh pe nashtar chalā gayā

mujh se ḳhatā huī thī ki aisī mirā ḳhudā

nārāz ho ke shahr se bāhar chalā gayā

shīshe lahūluhān paḌe haiñ jo farsh par

khiḌkī pe koī maar ke patthar chalā gayā

bāhar kā shor itnā garāñ thā ki bahr-e-amn

har shaḳhs apnī zaat ke andar chalā gayā

Thahrā thā aa ke ek musāfir kabhī yahāñ

phir shahr-e-tan ko aag lagā kar chalā gayā

kābuk ko ḳhālī dekh ke kuḌhtā hai dil mirā

jaane kahāñ safed kabūtar chalā gayā

sūraj bhī thak ke Duub gayā shaam ho ga.ī

din-bhar jo mere saath thā vo ghar chalā gayā

āḳhir saroñ pe dhuup kī dīvār gir paḌī

achchhā huā maiñ saa.e se uTh kar chalā gayā

'naqqāsh' dil meñ pyaas kī kīleñ gaḌī rahīñ

qadmoñ meñ aa ke ek samundar chalā gayā

phaila ke sar pe dard ki chadar chala gaya

ek shaKHs meri ruh pe nashtar chala gaya

mujh se KHata hui thi ki aisi mera KHuda

naraaz ho ke shahr se bahar chala gaya

shishe lahuluhan paDe hain jo farsh par

khiDki pe koi mar ke patthar chala gaya

bahar ka shor itna garan tha ki bahr-e-amn

har shaKHs apni zat ke andar chala gaya

Thahra tha aa ke ek musafir kabhi yahan

phir shahr-e-tan ko aag laga kar chala gaya

kabuk ko KHali dekh ke kuDhta hai dil mera

jaane kahan safed kabutar chala gaya

suraj bhi thak ke Dub gaya sham ho gai

din-bhar jo mere sath tha wo ghar chala gaya

aaKHir saron pe dhup ki diwar gir paDi

achchha hua main sae se uTh kar chala gaya

'naqqash' dil mein pyas ki kilen gaDi rahin

qadmon mein aa ke ek samundar chala gaya