phaile hue hain sae dar-o-baam par abhi

phaile hue haiñ saa.e dar-o-bām par abhī

ubhrī nahīñ hai azmat-e-nūr-e-sahar abhī

kyoñ jazba-e-talab ko nahīñ shauq-e-justujū

jalte to haiñ charāġh sar-e-rahguzar abhī

ḳhud hī jo baḌh ke thaam leñ dāman hayāt kā

itne kahāñ haiñ ahl-e-junūñ mo'atabar abhī

ai rahravān-e-rāh-e-tamannā baḌhe chalo

pahuñche nahīñ ho manzil-e-maqsūd par abhī

kitne bujhe bujhe se haiñ sho.ale hayāt ke

kitne udaas udaas haiñ shām-o-sahar abhī

kitnā badal gayā hai shu.ūr-e-mazāq-e-ġham

kitne fareb dete haiñ ahl-e-nazar abhī

hai kā.enāt-e-azmat-e-shaddād jalva-gar

insāniyat sisaktī hai har gaam par abhī

haiñ dāman-e-ḳhizāñ meñ bahāroñ kī azmateñ

nā-āshnā sukūñ se haiñ ahl-e-hunar abhī

'ḳhurshīd' jis se zulmat-e-shab faizyāb ho

āñkhoñ se duur hai vo ziyā-e-sahar abhī

phaile hue hain sae dar-o-baam par abhi

ubhri nahin hai azmat-e-nur-e-sahar abhi

kyon jazba-e-talab ko nahin shauq-e-justuju

jalte to hain charagh sar-e-rahguzar abhi

KHud hi jo baDh ke tham len daman hayat ka

itne kahan hain ahl-e-junun mo'atabar abhi

ai rahrawan-e-rah-e-tamanna baDhe chalo

pahunche nahin ho manzil-e-maqsud par abhi

kitne bujhe bujhe se hain shoale hayat ke

kitne udas udas hain sham-o-sahar abhi

kitna badal gaya hai shuur-e-mazaq-e-gham

kitne fareb dete hain ahl-e-nazar abhi

hai kaenat-e-azmat-e-shaddad jalwa-gar

insaniyat sisakti hai har gam par abhi

hain daman-e-KHizan mein bahaaron ki azmaten

na-ashna sukun se hain ahl-e-hunar abhi

'KHurshid' jis se zulmat-e-shab faizyab ho

aankhon se dur hai wo ziya-e-sahar abhi