phaili hui hai har-su dil-doz tirgi si

phailī huī hai har-sū dil-doz tīrgī sī

allah-re vo udāsī TuuTe hue diloñ kī

kāvish ke bāñkpan sī an-thak sī ik thakan sī

ik surḳh-rū sī saa.at ab rū-ba-rū khaḌī thī

albelī chāhatoñ sī pur-kaif tishnagī sī

bāñhoñ meñ bas ga.ī thī ik aañch qurbatoñ kī

ġham-hā-e-zindagī se hai rū-shanās yuuñ dil

ḳhushiyāñ nasīb hoñ to lagtī haiñ ajnabī sī

aahaT pe kaan har-dam thā intizār itnā

ma.alūm hī nahīñ thā ik umr kaT ga.ī thī

ik narm-rau sī nik.hat kuchh kah ga.ī hai dil ko

ab yaad aa rahī haiñ TuuTī rifāqateñ bhī

gaane lage sitāre lorī fazā fazā meñ

ab vaqt ko bhī shāyad kuchh niiñd aa ga.ī thī

dekhā jo ġhaur se to kirdār meñ tire kuchh

gahrī sī ek nisbat past-o-buland meñ thī

har sub.h chāhtī hai jalve na.e na.e se

har shaam māñgtī hai qurbat kisī hasīñ kī

bā-hosh jalvatoñ meñ sarmast ḳhalvatoñ meñ

nikhrī supurdagī thī pur-kaif qurbatoñ kī

kuchh ḳhush-nasīb lamhe jannat kī naġhmagī se

mānūsiyat halāvat nuz.hat rachī basī sī

ik unsurī tahārat rūh-e-ravāñ hai yaksar

ai ishq tere dam se jagmag hai zindagī kī

kuchh zaḳhm zaḳhm jaisī kuchh marham-e-rifāqat

kuchh ḳhud se dushmanī thī kuchh ḳhud se dostī thī

ab gūñjtā hai har-sū ik āshtī kā naġhma

raas aa ga.ī hai shāyad dil ko qalandarī hī

phaili hui hai har-su dil-doz tirgi si

allah-re wo udasi TuTe hue dilon ki

kawish ke bankpan si an-thak si ek thakan si

ek surKH-ru si saat ab ru-ba-ru khaDi thi

albeli chahaton si pur-kaif tishnagi si

banhon mein bas gai thi ek aanch qurbaton ki

gham-ha-e-zindagi se hai ru-shanas yun dil

KHushiyan nasib hon to lagti hain ajnabi si

aahaT pe kan har-dam tha intizar itna

malum hi nahin tha ek umr kaT gai thi

ek narm-rau si nikhat kuchh kah gai hai dil ko

ab yaad aa rahi hain TuTi rifaqaten bhi

gane lage sitare lori faza faza mein

ab waqt ko bhi shayad kuchh nind aa gai thi

dekha jo ghaur se to kirdar mein tere kuchh

gahri si ek nisbat past-o-buland mein thi

har subh chahti hai jalwe nae nae se

har sham mangti hai qurbat kisi hasin ki

ba-hosh jalwaton mein sarmast KHalwaton mein

nikhri supurdagi thi pur-kaif qurbaton ki

kuchh KHush-nasib lamhe jannat ki naghmagi se

manusiyat halawat nuzhat rachi basi si

ek unsuri tahaarat ruh-e-rawan hai yaksar

ai ishq tere dam se jagmag hai zindagi ki

kuchh zaKHm zaKHm jaisi kuchh marham-e-rifaqat

kuchh KHud se dushmani thi kuchh KHud se dosti thi

ab gunjta hai har-su ek aashti ka naghma

ras aa gai hai shayad dil ko qalandari hi