phenk yun patthar ki sath-e-ab bhi bojhal na ho

pheñk yuuñ patthar ki sat.h-e-āb bhī bojhal na ho

naqsh bhī ban jaa.e aur dariyā meñ bhī halchal na ho

khol yuuñ muTThī ki ik jugnū na nikle haath se

aañkh ko aise jhapak lamha koī ojhal na ho

hai safar darpesh to parchhā.īñ kī uñglī pakaḌ

raah meñ tanhā.ī ke ehsās se pāgal na ho

pahlī sīḌhī pe qadam rakh āḳhirī sīḌhī pe aañkh

manziloñ kī justujū meñ rā.egāñ ik pal na ho

zehn ḳhālī ho ga.e haiñ vaqt ke ehsās se

sāmne vo mas.ala rakh jis kā koī hal na ho

sab ke hī sīnoñ meñ hai phailā huā sāñsoñ kā habs

koī shahr aisā nahīñ jis kī fazā bojhal na ho

log aksar apne chehre par chaḌhā lete haiñ ḳhol

tū jise sonā samajhtā hai kahīñ pītal na ho

justujū us peḌ kī kyuuñ ho ki jo saaya na de

haath us Daalī pe kyā pahuñche ki jis par phal na ho

roz-o-shab lagtā rahe sochoñ kā mela zehn meñ

shor se ḳhālī kabhī ehsās kā jangal na ho

garm kar 'sājid' lahū ko dhīmī dhīmī aañch se

vaqt se pahle tire jazbāt meñ halchal na ho

phenk yun patthar ki sath-e-ab bhi bojhal na ho

naqsh bhi ban jae aur dariya mein bhi halchal na ho

khol yun muTThi ki ek jugnu na nikle hath se

aankh ko aise jhapak lamha koi ojhal na ho

hai safar darpesh to parchhain ki ungli pakaD

rah mein tanhai ke ehsas se pagal na ho

pahli siDhi pe qadam rakh aaKHiri siDhi pe aankh

manzilon ki justuju mein raegan ek pal na ho

zehn KHali ho gae hain waqt ke ehsas se

samne wo masala rakh jis ka koi hal na ho

sab ke hi sinon mein hai phaila hua sanson ka habs

koi shahr aisa nahin jis ki faza bojhal na ho

log aksar apne chehre par chaDha lete hain KHol

tu jise sona samajhta hai kahin pital na ho

justuju us peD ki kyun ho ki jo saya na de

hath us Dali pe kya pahunche ki jis par phal na ho

roz-o-shab lagta rahe sochon ka mela zehn mein

shor se KHali kabhi ehsas ka jangal na ho

garm kar 'sajid' lahu ko dhimi dhimi aanch se

waqt se pahle tere jazbaat mein halchal na ho