پھینکا ہوا گل بھی ترا پتھر کا مزہ دے

پھینکا ہوا گل بھی ترا پتھر کا مزہ دے

وہ بات بھی کہہ ڈال جو خنجر کا مزہ دے

دریا کو کھنگالوں بھی تو کچھ ہاتھ نہ آئے

اک اشک کو چکھوں تو سمندر کا مزہ دے

لٹ جائے نہ بیچارہ مسافر تو کرے کیا

پردیس کی ہر چیز اگر گھر کا مزہ دے

پھولوں سے بھری سیج کو تو اپنے لیے رکھ

یوگی ہوں مجھے کانٹوں کے بستر کا مزہ دے

بٹھلا دے کسی چلتی ہوئی راہ پہ اک دن

آنکھوں کو دھڑکتے ہوئے منظر کا مزہ دے

اڑتے ہوئے گر جاؤں سنبھل جاؤں اڑوں پھر

پرواز کبھی ٹوٹے ہوئے پر کا مزہ دے

پھر دیکھیں گے ہم بھی تری ایماں طلبی کو

اک بار تو اللہ تجھے زر کا مزہ دے

اے کاش میں باقرؔ کبھی وہ شعر بھی لکھوں

احساس کو جو زمزم و کوثر کا مزہ دے