phenka hua gul bhi tera patthar ka maza de

pheñkā huā gul bhī tirā patthar kā maza de

vo baat bhī kah Daal jo ḳhanjar kā maza de

dariyā ko khañgāl.ūñ bhī to kuchh haath na aa.e

ik ashk ko chakkhūñ to samundar kā maza de

luT jaa.e na bechāra musāfir to kare kyā

pardes kī har chiiz agar ghar kā maza de

phūloñ se bharī sej ko tū apne liye rakh

yogī huuñ mujhe kāñToñ ke bistar kā maza de

biThlā de kisī chaltī huī raah pe ik din

āñkhoñ ko dhaḌakte hue manzar kā maza de

uḌte hue gir jā.ūñ sañbhal jā.ūñ uḌuuñ phir

parvāz kabhī TuuTe hue par kā maza de

phir dekheñge ham bhī tirī īmāñ-talabī ko

ik baar to allāh tujhe zar kā maza de

ai kaash maiñ 'bāqar' kabhī vo she'r bhī likhkhūñ

ehsās ko jo zamzam-o-kausar kā maza de

phenka hua gul bhi tera patthar ka maza de

wo baat bhi kah Dal jo KHanjar ka maza de

dariya ko khangalun bhi to kuchh hath na aae

ek ashk ko chakkhun to samundar ka maza de

luT jae na bechaara musafir to kare kya

pardes ki har chiz agar ghar ka maza de

phulon se bhari sej ko tu apne liye rakh

yogi hun mujhe kanTon ke bistar ka maza de

biThla de kisi chalti hui rah pe ek din

aankhon ko dhaDakte hue manzar ka maza de

uDte hue gir jaun sanbhal jaun uDun phir

parwaz kabhi TuTe hue par ka maza de

phir dekhenge hum bhi teri iman-talabi ko

ek bar to allah tujhe zar ka maza de

ai kash main 'baqar' kabhi wo she'r bhi likhkhun

ehsas ko jo zamzam-o-kausar ka maza de