pher len aankhen murawwat dekhna

pher leñ āñkheñ muravvat dekhnā

apnī ulfat dekhnā merī mohabbat dekhnā

do hī din meñ kyā se kyā tum ho ga.e

aa.ine meñ apnī sūrat dekhnā

DhūñDhne par bhī nishāñ miltā nahīñ

mar miTūñ kī shān-e-ġhurbat dekhnā

aah se dar-parda us ko laag hai

aa.ine kī ye kudūrat dekhnā

daad mahjūrī kī phir hai justujū

de na dhokā apnī qismat dekhnā

tauba karnā to bahut āsān hai

phir badal jā.egī niyyat dekhnā

manzil-e-duniyā nahīñ ārām-gāh

hai abhī roz-e-qayāmat dekhnā

kar le o saffāk har jaur-o-jafā

rah na jaa.e koī hasrat dekhnā

ka.abe se but-ḳhāna meñ aa hī ga.e

khīñch laa.ī 'shauq' qismat dekhnā

pher len aankhen murawwat dekhna

apni ulfat dekhna meri mohabbat dekhna

do hi din mein kya se kya tum ho gae

aaine mein apni surat dekhna

DhunDhne par bhi nishan milta nahin

mar miTun ki shan-e-ghurbat dekhna

aah se dar-parda us ko lag hai

aaine ki ye kudurat dekhna

dad mahjuri ki phir hai justuju

de na dhoka apni qismat dekhna

tauba karna to bahut aasan hai

phir badal jaegi niyyat dekhna

manzil-e-duniya nahin aaram-gah

hai abhi roz-e-qayamat dekhna

kar le o saffak har jaur-o-jafa

rah na jae koi hasrat dekhna

kabe se but-KHana mein aa hi gae

khinch lai 'shauq' qismat dekhna