phir aapne dekha hai mohabbat ki nazar se

phir aap ne dekhā hai mohabbat kī nazar se

guzre na kahīñ gardish-e-daurāñ bhī idhar se

pūchheñ to zarā pech-o-ḳham-e-rāh kī bāteñ

kuchh log abhī lauT ke aa.e haiñ safar se

shāyad kahīñ sūraj kī kiran shaam ko phūTe

ham sham.a jalā.e hue baiThe haiñ sahar se

logo mirī āshufta-sarī par na karo tanz

ilzām utāro koī us zulf ke sar se

dekhā na unheñ dīda-e-hairat ne dobāra

jalvoñ ko shikāyat hai mirī tāb-e-nazar se

ḳhushbū-e-gul-o-lāla chhupā lete haiñ patte

ab qadr-e-hunar hai to faqat arz-e-hunar se

taare to chamak apnī dikhāte haiñ sahar tak

dil Dūbne lagtā hai magar pichhle pahar se

ġhairoñ kī nigāheñ tire jalvoñ se haiñ sairāb

ai kaash ye bādal mirī āñkhoñ pe bhī barse

zulmat hī ke saa.e meñ sukūñ DhūñDiye 'maz.har'

ḳhairāt bahut maañg chuke nūr-e-sahar se

phir aap ne dekha hai mohabbat ki nazar se

guzre na kahin gardish-e-dauran bhi idhar se

puchhen to zara pech-o-KHam-e-rah ki baaten

kuchh log abhi lauT ke aae hain safar se

shayad kahin suraj ki kiran sham ko phuTe

hum shama jalae hue baiThe hain sahar se

logo meri aashufta-sari par na karo tanz

ilzam utaro koi us zulf ke sar se

dekha na unhen dida-e-hairat ne dobara

jalwon ko shikayat hai meri tab-e-nazar se

KHushbu-e-gul-o-lala chhupa lete hain patte

ab qadr-e-hunar hai to faqat arz-e-hunar se

tare to chamak apni dikhate hain sahar tak

dil Dubne lagta hai magar pichhle pahar se

ghairon ki nigahen tere jalwon se hain sairab

ai kash ye baadal meri aankhon pe bhi barse

zulmat hi ke sae mein sukun DhunDiye 'mazhar'

KHairaat bahut mang chuke nur-e-sahar se