phir aaya jam-ba-kaf gul-ezar ai waiz

phir aayā jām-ba-kaf gul-ezār ai vaa.iz

shikast-e-tauba kī phir hai bahār ai vaa.iz

na jaan mujh ko tū muḳhtār saḳht huuñ majbūr

nahīñ hai dil pe mirā iḳhtiyār ai vaa.iz

anār-e-ḳhuld ko tū rakh ke haiñ pasand hameñ

kucheñ vo yaar kī rashk-e-anār ai vaa.iz

usī kī kākul pur-pech kī qasam hai mujhe

ki tere va.az haiñ sab pechdār ai vaa.iz

hamāre dard ko kyā jaane tū ki tujh ko hai

na dard-e-yār na dard-e-dayār ai vaa.iz

kiyā jo zikr-e-qayāmat ye kyā qayāmat kī

ki yaad aayā mujhe qad-e-yār ai vaa.iz

bhulā.egā na kabhī yād-e-gul-ruḳhāñ 'ehsāñ'

koī vo samjhe hai samjhā hazār ai vaa.iz

phir aaya jam-ba-kaf gul-ezar ai waiz

shikast-e-tauba ki phir hai bahaar ai waiz

na jaan mujh ko tu muKHtar saKHt hun majbur

nahin hai dil pe mera iKHtiyar ai waiz

anar-e-KHuld ko tu rakh ke hain pasand hamein

kuchen wo yar ki rashk-e-anar ai waiz

usi ki kakul pur-pech ki qasam hai mujhe

ki tere waz hain sab pechdar ai waiz

hamare dard ko kya jaane tu ki tujh ko hai

na dard-e-yar na dard-e-dayar ai waiz

kiya jo zikr-e-qayamat ye kya qayamat ki

ki yaad aaya mujhe qad-e-yar ai waiz

bhulaega na kabhi yaad-e-gul-ruKHan 'ehsan'

koi wo samjhe hai samjha hazar ai waiz