phir andheri rah mein koi diya mil jaega

phir añdherī raah meñ koī diyā mil jā.egā

tum akele ghar se niklo qāfila mil jā.egā

tañg-zarfī ḳhushk kar Dālegī dariyā dekh le

ham ko kyā koī samundar dūsrā mil jā.egā

kar rahā huuñ maiñ ta.āqub gardish-e-ayyām kā

ik na ik din zindagī terā patā mil jā.egā

āñdhiyo aa jaao khul kar maiñ charāġh-e-tūr huuñ

mujh se Takrāne kā tum ko bhī maza mil jā.egā

tañg mat kar ai zamīñ kar deñ ishāra ik agar

āsmānoñ se bhī ham ko aasrā mil jā.egā

sañg-e-furqat maar kar mat jaao mujh ko chhoḌ kar

dil kā shīsha toḌne se yaar kyā mil jā.egā

sāhiloñ par rahne vaalo ik zarā āvāz do

ġharq hotī kashtiyoñ ko hausla mil jā.egā

phir andheri rah mein koi diya mil jaega

tum akele ghar se niklo qafila mil jaega

tang-zarfi KHushk kar Dalegi dariya dekh le

hum ko kya koi samundar dusra mil jaega

kar raha hun main taaqub gardish-e-ayyam ka

ek na ek din zindagi tera pata mil jaega

aandhiyo aa jao khul kar main charagh-e-tur hun

mujh se Takrane ka tum ko bhi maza mil jaega

tang mat kar ai zamin kar den ishaara ek agar

aasmanon se bhi hum ko aasra mil jaega

sang-e-furqat mar kar mat jao mujh ko chhoD kar

dil ka shisha toDne se yar kya mil jaega

sahilon par rahne walo ek zara aawaz do

gharq hoti kashtiyon ko hausla mil jaega