phir andheron ne raste roke

phir añdheroñ ne rāste roke

phir na.e ḳhizr haiñ na.e dhoke

ġham ke māroñ kī sādgī dekho

māñgte haiñ ye har ḳhushī ro ke

ham ki jūyā-e-ālam-e-nau the

ghar ko lauTe kahāñ kahāñ ho ke

ham se mat pūchh sub.h kab hogī

ham ne sadiyāñ gañvā.ī haiñ so ke

juz ajal koī to sila miltā

zindagī tere bojh ko Dho ke

zahr zindāñ salīb yaad aa.e

zehn meñ tuḳhm-e-āgahī bo ke

baat insāñ kī kyuuñ sune 'ahsan'

jo farishta ho vo use Toke

phir andheron ne raste roke

phir nae KHizr hain nae dhoke

gham ke maron ki sadgi dekho

mangte hain ye har KHushi ro ke

hum ki juya-e-alam-e-nau the

ghar ko lauTe kahan kahan ho ke

hum se mat puchh subh kab hogi

hum ne sadiyan ganwai hain so ke

juz ajal koi to sila milta

zindagi tere bojh ko Dho ke

zahr zindan salib yaad aae

zehn mein tuKHm-e-agahi bo ke

baat insan ki kyun sune 'ahsan'

jo farishta ho wo use Toke