phir bhi mujhe kisi se yahan kuchh gila nahin

phir bhī mujhe kisī se yahāñ kuchh gila nahīñ

maiñ chīḳhtā huuñ aur koī boltā nahīñ

ashkoñ kā kārvān abhī tak thamā nahīñ

tū ne hamāre hijr kā qissa sunā nahīñ

maiñ ne vafā kā jaam abhī tak piyā nahīñ

ye ittifāq hī hai koī hādisa nahīñ

apnī batāo kaise basar ho rahī hai dost

merā kisī galī se koī rābta nahīñ

maiñ bhī talāshtā huuñ agar tum madad karo

vo shaḳhs jis ke dil meñ koī vasvasa nahīñ

kahte haiñ mujh ko dost ki sabr-o-razā bhī siikh

vo kaam kah rahe haiñ jo un se huā nahīñ

ḳhvāhish sī ho rahī bichhaḌ jā.ūñ ek din

ye ārzū-e-dil hai koī faisla nahīñ

ab tak badan ke dasht hare ho nahīñ sake

ik zaḳhm hai jo tū ne hamārā siyā nahīñ

be-mausamī ghuTan kā baserā hai in dinoñ

bārish se aur havā se to koī gila nahīñ

jitne bhī rang-o-nūr ke mausam the jhaḌ ga.e

ab raushnī na maañg ki ik bhī diyā nahīñ

jo lutf tere hijr ne baḳhshā hai har ghaḌī

shāyad tire visāl meñ is kā mazā nahīñ

go intizār-e-vasl meñ kaT jaa.e saarī umr

is rog kā ilaaj bhī tere sivā nahīñ

bārish jamāl-e-yār kī har ḳhās-o-ām par

lekin mire nasīb meñ terī atā nahīñ

ḳhairāt us ke kaase meñ apne karam kī Daal

ik shaḳhs tere dar se abhī tak uThā nahīñ

dasht-e-suḳhan kī sair ko ik umr ho ga.ī

lekin tire jamāl pe kuchh likh sakā nahīñ

phir bhi mujhe kisi se yahan kuchh gila nahin

main chiKHta hun aur koi bolta nahin

ashkon ka karwan abhi tak thama nahin

tu ne hamare hijr ka qissa suna nahin

main ne wafa ka jam abhi tak piya nahin

ye ittifaq hi hai koi hadisa nahin

apni batao kaise basar ho rahi hai dost

mera kisi gali se koi rabta nahin

main bhi talashta hun agar tum madad karo

wo shaKHs jis ke dil mein koi waswasa nahin

kahte hain mujh ko dost ki sabr-o-raza bhi sikh

wo kaam kah rahe hain jo un se hua nahin

KHwahish si ho rahi bichhaD jaun ek din

ye aarzu-e-dil hai koi faisla nahin

ab tak badan ke dasht hare ho nahin sake

ek zaKHm hai jo tu ne hamara siya nahin

be-mausami ghuTan ka basera hai in dinon

barish se aur hawa se to koi gila nahin

jitne bhi rang-o-nur ke mausam the jhaD gae

ab raushni na mang ki ek bhi diya nahin

jo lutf tere hijr ne baKHsha hai har ghaDi

shayad tere visal mein is ka maza nahin

go intizar-e-wasl mein kaT jae sari umr

is rog ka ilaj bhi tere siwa nahin

barish jamal-e-yar ki har KHas-o-am par

lekin mere nasib mein teri ata nahin

KHairaat us ke kase mein apne karam ki Dal

ek shaKHs tere dar se abhi tak uTha nahin

dasht-e-suKHan ki sair ko ek umr ho gai

lekin tere jamal pe kuchh likh saka nahin