phir chale tir-e-nazar phir wo tamasha dekhen

phir chale tīr-e-nazar phir vo tamāshā dekheñ

kyā mirā dil hai mire dil kā kalejā dekheñ

vo mire naz' ke 'ālam kā tamāshā dekheñ

ab jo aa.e haiñ to jaatī huī duniyā dekheñ

vaqt kam aur zamāne meñ hazāroñ manzar

pūchhte haiñ nigah-e-shauq se kyā kyā dekheñ

ham ne maanā ki bahut dekhe haiñ marne vaale

aap marne kā hamāre bhī tamāshā dekheñ

chhupne vaale havas-e-tālib-e-dīdār to dekh

ye tamanna thī ki ham hasb-e-tamannā dekheñ

aa.ina sāmne rakh lījiye khul jaa.e abhī

aap kyā chiiz haiñ ye aap tamāshā dekheñ

ātish-e-'ishq se dil ḳhaak huā jaatā hai

ghar kisī kā jale aur aap tamāshā dekheñ

maut kī fikr meñ be-maut marā jaatā huuñ

mujh ko dekheñ vo mire dil kī tamanna dekheñ

ham ko auroñ se zamāne meñ sarokār nahīñ

tū dikhā.e jo tamāshā vo tamāshā dekheñ

sadqe sadqe tire ai jalva-e-jānāñ sadqe

jo tujhe dekh leñ vo muñh na kisī kā dekheñ

hai yaqīñ hazrat-e-'bismil' kī tarah hoñ bismil

aap agar un ke taḌapne kā tamāshā dekheñ

phir chale tir-e-nazar phir wo tamasha dekhen

kya mera dil hai mere dil ka kaleja dekhen

wo mere naz' ke 'alam ka tamasha dekhen

ab jo aae hain to jati hui duniya dekhen

waqt kam aur zamane mein hazaron manzar

puchhte hain nigah-e-shauq se kya kya dekhen

hum ne mana ki bahut dekhe hain marne wale

aap marne ka hamare bhi tamasha dekhen

chhupne wale hawas-e-talib-e-didar to dekh

ye tamanna thi ki hum hasb-e-tamanna dekhen

aaina samne rakh lijiye khul jae abhi

aap kya chiz hain ye aap tamasha dekhen

aatish-e-'ishq se dil KHak hua jata hai

ghar kisi ka jale aur aap tamasha dekhen

maut ki fikr mein be-maut mara jata hun

mujh ko dekhen wo mere dil ki tamanna dekhen

hum ko auron se zamane mein sarokar nahin

tu dikhae jo tamasha wo tamasha dekhen

sadqe sadqe tere ai jalwa-e-jaanan sadqe

jo tujhe dekh len wo munh na kisi ka dekhen

hai yaqin hazrat-e-'bismil' ki tarah hon bismil

aap agar un ke taDapne ka tamasha dekhen