phir chhuT gaya hath se daman-e-tamanna

phir chhūT gayā haath se dāmān-e-tamanna

phir luuT liyā baḳht ne sāmān-e-tamanna

phir jam gayā vīrāne kā naqsha mire ghar meñ

tārāj huā phir sar-o-sāmān-e-tamanna

har samt añdherā hai nazar kuchh nahīñ aatā

gul ho ga.ī phir sham.a-e-shabistān-e-tamanna

muddat se hai ik mauj tah-e-āb sī dil meñ

ab josh pe aatā nahīñ tūfān-e-tamannā

sochā kiye aa.egī kabhī fasl-e-bahārī

murjhā gayā āḳhir chamanistān-e-tamanna

saaqī hai na sahbā hai na sāġhar na subū hai

barham huī vo bazm-e-ḳhumistān-e-tamanna

tūfān kī maujoñ ke karam par hai safīna

hai ḳhāliq-e-ālam hī nigahbān-e-tamannā

jiite haiñ faqat maut kī ummīd pe ai 'nūr'

daftar meñ nahīñ ziist ke unvān-e-tamannā

phir chhuT gaya hath se daman-e-tamanna

phir luT liya baKHt ne saman-e-tamanna

phir jam gaya virane ka naqsha mere ghar mein

taraj hua phir sar-o-saman-e-tamanna

har samt andhera hai nazar kuchh nahin aata

gul ho gai phir shama-e-shabistan-e-tamanna

muddat se hai ek mauj tah-e-ab si dil mein

ab josh pe aata nahin tufan-e-tamanna

socha kiye aaegi kabhi fasl-e-bahaari

murjha gaya aaKHir chamanistan-e-tamanna

saqi hai na sahba hai na saghar na subu hai

barham hui wo bazm-e-KHumistan-e-tamanna

tufan ki maujon ke karam par hai safina

hai KHaliq-e-alam hi nigahban-e-tamanna

jite hain faqat maut ki ummid pe ai 'nur'

daftar mein nahin zist ke unwan-e-tamanna