phir ehtimam-e-talea-e-na-sazgar hai

phir ehtimām-e-tāle.a-e-nā-sāzgār hai

phir imtihān-e-gardish-e-lail-o-nahār hai

phir dil-nashīñ hai sheva-e-rusvā.ī āh-āh

phir haa.e haa.e ruuh rag-e-intizār hai

zabt-e-vafā kā phir ye taqāzā ki haañ ḳhamosh

lab par hai phir ye uzr ki dil be-qarār hai

Tapkā rahī hai rang-e-junūñ phir havā-e-shauq

mauj-e-ġhubār phir rag-e-abr-e-bahār hai

phir naqsh-e-yās bol uThā ai ḳhushā-fareb

dast-e-havas meñ ḳhāma-e-jādū-nigār hai

sun lo pukāre kahtī hai phir mastī-e-ḳhayāl

kah do naved-e-va.ada-e-dīdār-e-yār hai

ḳhākistar-e-ḳhayāl se chamke sharār-e-shauq

phir intizār-e-jumbish-e-dāmān-e-yār hai

phir josh-e-ḳhvāb-e-baḳht-e-siyah ke phire haiñ din

phir maiñ huuñ aur fasāna-e-shab-hā-e-tār hai

be-rangiyoñ meñ jalva-e-sad-rang dekhnā

ḳhvāb-e-adam bhī ā.ina-e-intizār hai

sab kuchh sahī 'vafā' magar itnā bhī soch lo

aalam tilism-e-ā.ina-e-e.atibār hai

phir ehtimam-e-talea-e-na-sazgar hai

phir imtihan-e-gardish-e-lail-o-nahaar hai

phir dil-nashin hai shewa-e-ruswai aah-ah

phir hae hae ruh rag-e-intizar hai

zabt-e-wafa ka phir ye taqaza ki han KHamosh

lab par hai phir ye uzr ki dil be-qarar hai

Tapka rahi hai rang-e-junun phir hawa-e-shauq

mauj-e-ghubar phir rag-e-abr-e-bahaar hai

phir naqsh-e-yas bol uTha ai KHusha-fareb

dast-e-hawas mein KHama-e-jadu-nigar hai

sun lo pukare kahti hai phir masti-e-KHayal

kah do nawed-e-wada-e-didar-e-yar hai

KHakistar-e-KHayal se chamke sharar-e-shauq

phir intizar-e-jumbish-e-daman-e-yar hai

phir josh-e-KHwab-e-baKHt-e-siyah ke phire hain din

phir main hun aur fasana-e-shab-ha-e-tar hai

be-rangiyon mein jalwa-e-sad-rang dekhna

KHwab-e-adam bhi aaina-e-intizar hai

sab kuchh sahi 'wafa' magar itna bhi soch lo

aalam tilism-e-aina-e-eatibar hai