پھر ہرا ہونے کی خواہش کا ارادہ سوکھے

پھر ہرا ہونے کی خواہش کا ارادہ سوکھے

کیوں بھلا سوکھا ہوا پیڑ دوبارہ سوکھے

میری چاہت ہے کہ گہرائی سے نکلیں آنسو

میری کوشش ہے زیادہ سے زیادہ سوکھے

وہ تمہارے لیے اک بات تھی پر میرے لیے

دریا سوکھا ہے اگر ایک بھی قطرہ سوکھے

چاہیے پھول کو اک پھول کوئی مالی نہیں

ہم سفر تو وہ ہے جو ساتھ اکٹھا سوکھے

میں نہیں چاہتا ہوں اب کہ مری پیاس مٹے

میں نہیں چاہتا اب پیاس کا دریا سوکھے

مت کرو ذکر کہ برسات نہیں ہوتی اب

میں نہیں چاہتا تصویر میں جھرنا سوکھے