phir hujum-e-gham-e-jaanan hai KHuda KHair kare

phir hujūm-e-ġham-e-jānāñ hai ḳhudā ḳhair kare

phir mirī maut kā sāmāñ hai ḳhudā ḳhair kare

un ko sūjhī hai taġhāful kī rivāyāt-e-kuhan

zindagī mujh se gurezāñ hai ḳhudā ḳhair kare

khul na jaa.e kahīñ aise meñ sitāroñ kā bharam

vā naqāb-e-ruḳh-e-jānāñ hai ḳhudā ḳhair kare

apnī hī aag meñ jal jaa.e na dāmān-e-hayāt

har nafas sho.ala-ba-dāmāñ hai ḳhudā ḳhair kare

ye javānī ye tabassum ye nigāhoñ kā fusūñ

kashmakash meñ mirā īmāñ hai ḳhudā ḳhair kare

dast-e-nāzuk meñ tire rang-e-hinā ke badle

surḳhī-e-ḳhūn-e-shahīdāñ hai ḳhudā ḳhair kare

pīchhe pīchhe chale aate haiñ mire dair-o-haram

sāmne manzil-e-jānāñ hai ḳhudā ḳhair kare

aaj phir dil kā har ik zaḳhm ubhar aayā hai

aaj phir koī ġhazal-ḳhvāñ hai ḳhudā ḳhair kare

rang lā kar hī rahī aglī javānī 'muḳhtār'

dast-e-vahshat meñ garebāñ hai ḳhudā ḳhair kare

phir hujum-e-gham-e-jaanan hai KHuda KHair kare

phir meri maut ka saman hai KHuda KHair kare

un ko sujhi hai taghaful ki riwayat-e-kuhan

zindagi mujh se gurezan hai KHuda KHair kare

khul na jae kahin aise mein sitaron ka bharam

wa naqab-e-ruKH-e-jaanan hai KHuda KHair kare

apni hi aag mein jal jae na daman-e-hayat

har nafas shoala-ba-daman hai KHuda KHair kare

ye jawani ye tabassum ye nigahon ka fusun

kashmakash mein mera iman hai KHuda KHair kare

dast-e-nazuk mein tere rang-e-hina ke badle

surKHi-e-KHun-e-shahidan hai KHuda KHair kare

pichhe pichhe chale aate hain mere dair-o-haram

samne manzil-e-jaanan hai KHuda KHair kare

aaj phir dil ka har ek zaKHm ubhar aaya hai

aaj phir koi ghazal-KHwan hai KHuda KHair kare

rang la kar hi rahi agli jawani 'muKHtar'

dast-e-wahshat mein gareban hai KHuda KHair kare