پھر ہجوم غم جاناں ہے خدا خیر کرے

پھر ہجوم غم جاناں ہے خدا خیر کرے

پھر مری موت کا ساماں ہے خدا خیر کرے

ان کو سوجھی ہے تغافل کی روایات کہن

زندگی مجھ سے گریزاں ہے خدا خیر کرے

کھل نہ جائے کہیں ایسے میں ستاروں کا بھرم

وا نقاب رخ جاناں ہے خدا خیر کرے

اپنی ہی آگ میں جل جائے نہ دامان حیات

ہر نفس شعلہ بداماں ہے خدا خیر کرے

یہ جوانی یہ تبسم یہ نگاہوں کا فسوں

کشمکش میں مرا ایماں ہے خدا خیر کرے

دست نازک میں ترے رنگ حنا کے بدلے

سرخیٔ خون شہیداں ہے خدا خیر کرے

پیچھے پیچھے چلے آتے ہیں مرے دیر و حرم

سامنے منزل جاناں ہے خدا خیر کرے

آج پھر دل کا ہر اک زخم ابھر آیا ہے

آج پھر کوئی غزل خواں ہے خدا خیر کرے

رنگ لا کر ہی رہی اگلی جوانی مختارؔ

دست وحشت میں گریباں ہے خدا خیر کرے