phir ek KHushi se kiya usne ham-kanar mujhe

phir ik ḳhushī se kiyā us ne ham-kanār mujhe

vo khīñch le gayā dariyā-e-ġham ke paar mujhe

charāġh-e-rāh-e-mohabbat huuñ taaq meñ rakhnā

ġhubār-e-qarya-e-nafrat meñ mat utaar mujhe

maiñ us kī yaad meñ rātoñ ko so nahīñ saktī

vo duur rah ke bhī rakhtā hai ashk-bār mujhe

kaTī patañg sī aTkī huuñ shāḳh-e-nāzuk par

havā kā haath bhī kartā hai taar taar mujhe

miTā de mujh ko yā rakh le sameT kar dil meñ

tū hijr jaisī aziyyat se mat guzār mujhe

tū jāntā hai ki maiñ be-gharī se Dartī huuñ

nikāl dil se na aise tū baar baar mujhe

maiñ intizār ke barzaḳh meñ jaltī rahtī huuñ

hazār vasvase rakhte haiñ be-qarār mujhe

maiñ chāhtī huuñ use bhūlnā magar 'fauzī'

qasam ḳhudā kī nahīñ ḳhud pe iḳhtiyār mujhe

phir ek KHushi se kiya us ne ham-kanar mujhe

wo khinch le gaya dariya-e-gham ke par mujhe

charagh-e-rah-e-mohabbat hun taq mein rakhna

ghubar-e-qarya-e-nafrat mein mat utar mujhe

main us ki yaad mein raaton ko so nahin sakti

wo dur rah ke bhi rakhta hai ashk-bar mujhe

kaTi patang si aTki hun shaKH-e-nazuk par

hawa ka hath bhi karta hai tar tar mujhe

miTa de mujh ko ya rakh le sameT kar dil mein

tu hijr jaisi aziyyat se mat guzar mujhe

tu jaanta hai ki main be-ghari se Darti hun

nikal dil se na aise tu bar bar mujhe

main intizar ke barzaKH mein jalti rahti hun

hazar waswase rakhte hain be-qarar mujhe

main chahti hun use bhulna magar 'fauzi'

qasam KHuda ki nahin KHud pe iKHtiyar mujhe