phir jahan-e-arzu ki dilkashi bahla gai

phir jahān-e-ārzū kī dilkashī bahlā ga.ī

ātī-jātī kuchh rutoñ kī rāgnī bharmā ga.ī

phir badan kā ik ta'alluq chuTkiyāñ lene lagā

ik hasīñ mauj-e-havā phir rāste mahkā ga.ī

ishrat-e-nazzārgī thī be-ḳhudī-e-shauq tak

uf ḳhirad kī raushnī manzar sabhī dhuñdlā ga.ī

ajnabī se lams shāyad ajnabī hī rah ga.e

be-hisī be-chehragī chehroñ pe yaksar chhā ga.ī

aah vo ehsās kā aalam ki jab lab sil ga.e

āp-bītī aap palkoñ par machal kar aa ga.ī

āsmān-e-fikr par yādoñ kī ik qaus-e-quzah

māziyoñ kā ruup daur-e-hāl meñ dikhlā ga.ī

rāstoñ kī dhuul meñ thiiñ irtiqā kī manzileñ

justujū kuchh zindagī ke rāste dikhlā ga.ī

ātī-jātī sab rutoñ kā le rahī thī jā.eza

rahrav-e-darmānda kī aañkh jo pathrā ga.ī

raah chalte husn kī parchhā.iyoñ ke ruup meñ

kuchh machaltī rangatoñ kī tishnagī bharmā ga.ī

phir jahan-e-arzu ki dilkashi bahla gai

aati-jati kuchh ruton ki ragni bharma gai

phir badan ka ek ta'alluq chuTkiyan lene laga

ek hasin mauj-e-hawa phir raste mahka gai

ishrat-e-nazzargi thi be-KHudi-e-shauq tak

uf KHirad ki raushni manzar sabhi dhundla gai

ajnabi se lams shayad ajnabi hi rah gae

be-hisi be-chehragi chehron pe yaksar chha gai

aah wo ehsas ka aalam ki jab lab sil gae

aap-biti aap palkon par machal kar aa gai

aasman-e-fikr par yaadon ki ek qaus-e-quzah

maziyon ka rup daur-e-haal mein dikhla gai

raston ki dhul mein thin irtiqa ki manzilen

justuju kuchh zindagi ke raste dikhla gai

aati-jati sab ruton ka le rahi thi jaeza

rahraw-e-darmanda ki aankh jo pathra gai

rah chalte husn ki parchhaiyon ke rup mein

kuchh machalti rangaton ki tishnagi bharma gai