phir kabhi KHwab na aae wo suhane wale

phir kabhī ḳhvāb na aa.e vo suhāne vaale

maiñ samajhtī thī ki phir ā.eñge jaane vaale

ghar se nikle to milā ajnabī chehroñ kā hujūm

jhaḌ ga.e phuul bhī shāḳhoñ se purāne vaale

ham haiñ TuuTī huī ik shāḳh-e-gul-e-zard magar

ham ko gul-dān meñ rakkheñge zamāne vaale

ham koī chāñd sitāre haiñ falak par chamkeñ

ham vo aañsū haiñ jo miTTī meñ samāne vaale

tan kī miTTī bhī to hamrāh nahīñ le ke ga.e

kaun sī samt ko jaate haiñ ye jaane vaale

kaise darvāze haiñ dastak nahīñ hotī jin par

jin se ruḳhsat hue pardes basāne vaale

ab ke barsāt bhī bārish ko taraste guzrī

khul ke ro bhī na sake hañsne hañsāne vaale

ab mire dil pe koī naqsh koī naam kahāñ

likhne vaale na rahe aur na miTāne vaale

kitne hī log gharoñ ko nahīñ lauTe haiñ 'sahar'

ham bhī jā.eñge to vāpas nahīñ aane vaale

phir kabhi KHwab na aae wo suhane wale

main samajhti thi ki phir aaenge jaane wale

ghar se nikle to mila ajnabi chehron ka hujum

jhaD gae phul bhi shaKHon se purane wale

hum hain TuTi hui ek shaKH-e-gul-e-zard magar

hum ko gul-dan mein rakkhenge zamane wale

hum koi chand sitare hain falak par chamken

hum wo aansu hain jo miTTi mein samane wale

tan ki miTTi bhi to hamrah nahin le ke gae

kaun si samt ko jate hain ye jaane wale

kaise darwaze hain dastak nahin hoti jin par

jin se ruKHsat hue pardes basane wale

ab ke barsat bhi barish ko taraste guzri

khul ke ro bhi na sake hansne hansane wale

ab mere dil pe koi naqsh koi nam kahan

likhne wale na rahe aur na miTane wale

kitne hi log gharon ko nahin lauTe hain 'sahar'

hum bhi jaenge to wapas nahin aane wale