پھر کئی دن ذکر اس کا قدر دانوں میں رہا

پھر کئی دن ذکر اس کا قدر دانوں میں رہا

ایک چہرہ جو کئی آئینہ خانوں میں رہا

نت نئے مضمون کچھ اچھی زمینوں کی تلاش

یہ سراب فن غزل کے ہم کسانوں میں رہا

روز تازہ پھول ملتے تھے وہاں پہ اس لیے

تتلیوں کا آنا جانا ان دکانوں میں رہا

قبضہ کر کے بیٹھا ہے دل کے مکاں پہ آج کل

زندگی بھر جو کرائے کے مکانوں میں رہا

میں زمیں پہ بیٹھ کے کہتا رہا غزلوں کے شعر

اور مرا حسن تخیل آسمانوں میں رہا

ہر قدم پہ زندگی کرتی رہی مجھ سے سوال

عمر بھر میں زندگی کے امتحانوں میں رہا

اب کے دلبرؔ اپنی خاموشی سے سب کچھ کہہ گیا

میں زباں رکھتے ہوئے بھی بے زبانوں میں رہا