phir kaun hai jahan mein but bewafa ke baad

phir kaun hai jahāñ meñ but bevafā ke baad

mere liye to ek vahī hai ḳhudā ke baad

hai jurm āshiqī to ḳhatā kar ḳhatā ke baad

aatā hai is meñ lutf-e-ḳhatā har sazā ke baad

samjhā kiye vo ahl-e-ġharaz kā mo.āmla

miTnā paḌā mujhe bhī ḳhud apnī vafā ke baad

āñkheñ uThī huī haiñ agar haath gir paḌe

ya.anī ki intizār-e-asar hai duā ke baad

aatā hai tujh ko aur talavvun-mizāj kyā

shoḳhī ke baad sharm to kyā hai hayā ke baad

ab maiñ huuñ aur kashākash-e-ummīd-o-bīm hai

vo muskurā rahe haiñ mirī iltijā ke baad

ab to davām-e-hāl kī hai aarzū mujhe

matlūb aur kuchh nahīñ un kī razā ke baad

Dar hai ki ye nayā koī tarz-e-sitam na ho

kyoñ mā.il-e-karam haiñ vo jaur-o-jafā ke baad

sañbhle koī to Thokareñ khānā burā nahīñ

ho to talāsh-e-haq havas-e-mā-sivā ke baad

kyoñ āstān-e-dost milī phir koī jabīñ

merī jabīn-e-dair-o-haram-āshnā ke baad

'shākir' jab us ne sun ke kahā jī bajā durust

ham sar jhukā ke rah ga.e arz-e-vafā ke baad

phir kaun hai jahan mein but bewafa ke baad

mere liye to ek wahi hai KHuda ke baad

hai jurm aashiqi to KHata kar KHata ke baad

aata hai is mein lutf-e-KHata har saza ke baad

samjha kiye wo ahl-e-gharaz ka moamla

miTna paDa mujhe bhi KHud apni wafa ke baad

aankhen uThi hui hain agar hath gir paDe

yani ki intizar-e-asar hai dua ke baad

aata hai tujh ko aur talawwun-mizaj kya

shoKHi ke baad sharm to kya hai haya ke baad

ab main hun aur kashakash-e-ummid-o-bim hai

wo muskura rahe hain meri iltija ke baad

ab to dawam-e-haal ki hai aarzu mujhe

matlub aur kuchh nahin un ki raza ke baad

Dar hai ki ye naya koi tarz-e-sitam na ho

kyon mail-e-karam hain wo jaur-o-jafa ke baad

sanbhle koi to Thokaren khana bura nahin

ho to talash-e-haq hawas-e-ma-siwa ke baad

kyon aastan-e-dost mili phir koi jabin

meri jabin-e-dair-o-haram-ashna ke baad

'shakir' jab us ne sun ke kaha ji baja durust

hum sar jhuka ke rah gae arz-e-wafa ke baad